অখিল তুমি ভালে আছা?
কবি- চেনিৰাম গগৈ ( Cheniram Gogoi)
তুমি কি বিচাৰিছা বিপ্লৱী অখিল
বিখ্যাত হ’ব বিচাৰিছা নে দুখীয়া মানুহৰ কাৰণে যুঁজিছা?
যোৱা বিশটা বছৰে মই তোমাক লক্ষ্য কৰিছোঁ
তুমি এযোৰ হাৱাই চেন্দেল পিন্ধি আছা
কান্ধত মোনা এটা লৈ তুমি ঘূৰি ফুৰিছা
তুমি অন্যায়ৰ বিৰোধিতা কৰি ফুৰিছা
তাকে লৈ তোমাক কত ইতিকিং
কিমান গল্প কিমান কবিতা কিমান ভাষণ
সকলো সলনি হ’ল কিন্তু তুমি একেই হৈ থাকিলা
তোমাৰ ভাল দিনতো তুমি এম এল এ নহ’লা মন্ত্ৰী নহ’লা
বহুতৰ মতে সেইটো তোমাৰ স্মৰণীয় ভুল
তুমি এজন অঁকৰা মানুহ।
তুমি সদায় চিঞৰি চিঞৰি কথা কোৱা
কাৰণ তুমি ভাবা যে চিঞৰি নক’লে কোনেও নুশুনে
তুমি চিঞৰা কাৰণেই বহুতে ভাবে যে তোমাৰ লাইন লেংথ ঠিক নহয় তুমি য’তে ত’তে থিয় হোৱা
কিন্তু মানুহে ঠিকেই শুনিছে তোমাৰ বুকুৰ আৱাজ।
যোৱা বিশটা বছৰে তুমি একেদৰেই আছা
এজন বিপ্লৱীৰ কাৰণে ই এক দীৰ্ঘকালিন পৰীক্ষা
জুয়ে পুৰি ৰঙা কৰা জলন্ত আঙঠা
তুমি জ্বলি আছা তুমি জ্বলি থাকিবা
তুমি শেষ নোহোৱা এটা আৰম্ভণি।
ভাত খাই পেট নভৰা মানুহবোৰে তোমাক চিনি পায়
পথাৰত টঙী ৰখা মানুহবোৰে তোমাক চিনি পায়
জাৰত জুই পুৱাই ৰাতি পাৰ কৰা মানুহবোৰে তোমাক চিনি পায়
তেওঁলোকৰ প্ৰাৰ্থনা: অখিলৰ ভাল হওক
অখিল জীয়াই থাকক।
তুমি এতিয়া কাৰো কাষত নাই
তুমি জেলত আছা
তুমি তাত যিমান দিন থাকিবা
সিমান দিন তোমাৰ নাম হ’ব চৰ্চিত
সিমানেই বৃদ্ধি পাব তোমাৰ জনপ্ৰিয়তা
কাৰণ তুমি জেলৰ ভিতৰতো সলনি নোহোৱা এজন বিপ্লৱী
‘পাগত উঠা তীখা’ ।
তুমি ইতিহাস হজম কৰা কিতাপ পঢ়া মানুহ
তুমি দুখ কষ্ট বেদনাৰ অন্তিম সহ্যশক্তি।
This is an Assamese poem on Akhil Gogoi, an Indian peasant leader and RTI activist from Assam.
Featured image: The Indian Express
